Elkartasun ekintza hau, ostiral arratsaldean hasi zen, Lonbotik Argala plazaraino egindako giza katearekin. Bertan, 50 lagun inguruk parte hartu zuten. Giza-katea plazara heltzerako hainbat lagun zeuden kanpalekua prestatzen.
Hasiera batean, baraualdian parte hartuko zutenek kanpaleku osoa plazan altxatzeko asmoa bazuten ere, eguraldiak laguntzen ez zuenez, "kanpin-denda nagusia" (bideo emanaldiak, hitzaldiak,... eta behar bazen lo egingo zen lekua) udaletxeko aterpean jartzea pentsatu zuten. Baina euria eta hotza oztopo txikia bailiran, beste bat gehitu zitzaien, alkatearen jarrera. Eta horrela ba, udaletxeko komunak erabiltzea ukatzeaz gain, udaletxeko arkupea ere ez zien erabiltzen utzi.
Baraualdia burutuko zutenek, poteoan zebilen alkatea ikusi eta beragana jo zuten egoera konpondu eta berbideratzeko asmoz. Baina honek hitz egiteari ere ezezkoa eman zion. Baina ez zen erantzunik eman gabe geratu. Ordu bete ingurura (polizia) munizipalak bidali zituen arkupeak hutsik zeudela baieztatzeko, eta bide batez, udaletxeko kartelak kentzea agintzeko.
Dena den, oztopoak oztopo, ekimenak aurrera egin zuen. Ostiral gauean bertan, "Itsasoaren alaba" dokumentala ikusi zuten "kanpin-denda nagusian", eta larunbat gauean Gerra Zibilaren inguruko tertula izan zen. Gaur, igandea, kontzentrazio jendetsua burutu dute ekimenari amaiera emateko hamarnaka lagunek.
Esan ere, bat baino gehiago izan direla tartetxo bat hartu eta baraualdia egiten zutenei babesa ematera kanpalekura hurbildu direnak.
No hay comentarios:
Publicar un comentario