Bazkal ostean hasi zen festa kiroldegiko pista urdinean. Ume, guraso eta irakasleak hantxe elkartu ziren aurreko asteetan prestatutako mozorroak jantzita dantzan aritzeko. Eskolako umeen ikuskizuna amaituta txokolatea banatu zuten indarrak berreskuratu eta festarekin jarraitzeko. Ondoren hasi zen gazteenentzako ikuskizuna.
18.30ak aldera Aritz Berriko dantzariak agertu ziren. Hauek ere mozorroturik nola ez. Baina nor zen nor? neskak mutilez, mutilak neskez; mutilek nesken dantzak, neskek mutilenak... hau nahastea!! Txistulariek lagunduta ederki girotu zuten arratsalde bukaera.
Kaletik ere makina bat gazte zihoazen mozorroturik. A ze aukera mozorroen babesean barrabaskeriaren bat egiteko...
Gaua hurbildu ahala umeen lekua gazteek hartu zuten eta pista urdinarena tabernek. Hauek ere, azken urteetan bezala, eguneroko itxura aldatu zuten giroa sortu eta jendea gehiago bertaratzeko. Nabari zen batzuek orduak sartu zituztela aurreko egunetan eta egindako lanak fruituak eman zituen. Benetan polit geratu ziren taberna batzuetako sarrerak.
No hay comentarios:
Publicar un comentario